जोरपाटी- गोकर्णेश्वर नगरपालिकाको वडा नम्बर-५ जोरपाटीमा रहेको सेन्टेनियल स्कूलका एसईई दिने विद्यार्थीको बिदाई कार्यक्रम सम्पन्न भएको छ । सोमबार छिमेकी पार्टी प्यालेसमा आयोजित एक कार्यक्रमका बीच कक्षा ९ मा अध्ययनरत विद्यार्थीहरुले कक्षा १० मा अध्ययनरत यस वर्षको एसईई परीक्षा दिने विद्यार्थीहरुलाई विदाई गरेका छन् । सेन्टेनियल स्कूलले निरन्तर विभिन्न क्रियाकलापहरु गर्दै आएको छ ।

एसईई दिने विद्यार्थीलाई विदाई गर्ने कार्यक्रमको प्रमुख अतिथि प्याब्सन गोकर्णेश्वरका निवर्तमान अध्यक्ष एवम् सर्वनाम शिक्षालयका प्रधानध्यापक दुर्गानाथ सिवाकोटी रहनुभएको थियो । कार्यक्रममा बोल्दै प्रमुख अतिथि सिवाकोटीले विद्यार्थीहरुलाई एसईईको सफलताको शुभकामना दिनुभएको थियो ।कार्यक्रममा विद्यार्थीहरुलाई अविर, खादा र मायाको चिनो दिएर बिदाई गरिएको थियो । विदाई कार्यक्रममा बोल्ने शिक्षकले एसईई परीक्षा दिने विद्यार्थीहरुलाई शैक्षिक प्रगतिको शुभकामना दिएका छन । कार्यक्रममा बोल्दै विद्यालयका प्रिन्सिपल डाक्टर ऋषिकेस वाग्लेले आउदै गरेको एसईई परिक्षामा कक्षा १० का विद्यार्थीहरुले उत्कृष्ट नतिजा ल्याउनेमा आफु विश्वस्त रहेको बताउनुभयो ।कार्यक्रममा बोल्दै विद्यालयका प्रबन्धक श्याम शाहीले सेन्टेनियलका विद्यार्थीहरुले एसईई परिक्षाका लागी उत्कृष्ट तयारी गरिरहेको जानकारी दिनुभयो । सो अवसरमा बोल्दै प्रबन्धक शाहीले विद्यार्थीहरुलाई उच्च कोटीको शिक्षण सिकाईका लागी सेन्टेनियल स्कूलले सधैं प्रेरित गरिरहेको बताउदै प्रयोगात्मक ढँगले पठनपाठन भैरहेको जानकारी दिनुभयो ।

त्यस्तै कार्यक्रममा बोल्दै विद्यालयका संयोजक डाक्टर मोतिराम फुयाँलले कक्षा १० को २०८१ ब्याचलाई बिदाई गर्दै गर्दा आगामी भविष्यको सबै प्रयासहरूको लागि शुभकामना समेत दिनुभयो । उहाँले अभिभावकहरूलाई कार्यक्रममा सामेल भएर कार्यक्रमलाई विशेष बनाएकोमा धन्यवाद समेत व्यक्त गर्नुभयो । कुटुम्बा शिक्षा प्रतिष्ठान अन्तर्गत सेन्टेनियल स्कूल संचालनमा रहेको छ ।

कार्यक्रममा कक्षा १० मा अध्ययनरत विद्यार्थीहरुले विद्यालयमा रहदा र अध्ययन गर्दाका सुखद अनुभव साटासाट गरेका थिए । यही चैत्र ७ गतेबाट शुरु हुने एसईई परीक्षामा सेन्टेनियल स्कूलबाट २८ जना विद्यार्थी सहभागी हुँदैछन ।