सिन्धुपाल्चोक – जिल्लाको लिसंखुमा जन्मेका चर्चित साइकलिस्ट हर्क लामाले ‘क्यान्सर बिरामी सहयोग कोष’ स्थापना गर्ने उद्देश्यका साथ देशव्यापी साइकल यात्रा सुरु गर्न लागेका छन्।

लामा स्वयं पिसाबथैलीको क्यान्सर (ब्लाडर क्यान्सर) बाट बिगत केही वर्षदेखि संघर्षरत छन्। उपचारपछि स्वास्थ्यमा उल्लेखनीय सुधार आएपछि उनले क्यान्सर रोगबारे जनचेतना फैलाउने र उपचारका लागि सहयोग जुटाउने अभियान थालेका हुन्।

यो साइकल यात्रा अंग्रेजी नयाँ वर्ष २०२६ को जनवरी १ तारिखबाट पाँचथरको चिवाभञ्ज्याङबाट सुरु हुनेछ। लामा नेतृत्वको टोलीले १८ दिनमा झुलाघाट (बैतडी) पुगेर यात्रा सम्पन्न गर्नेछ। यात्राको दूरी झण्डै १८ सय किलोमिटर हुनेछ।

धुलिखेल अस्पतालमा बुधबार आयोजित पत्रकार सम्मेलनमा लामा भन्छन् – “म अहिले नेमल अवस्थामै छु। अबको एक वर्षसम्म पनि मेरो शरीरमा क्यान्सर देखिएन भने म यस रोगमाथि पूर्ण विजय हासिल गर्नेछु। क्यान्सरले मलाई हराउन सकेन, बरु जीवनको नयाँ अर्थ सिकायो। अब बाँकी जीवन समाज र क्यान्सर पीडितहरूको सेवामा समर्पित गर्ने संकल्प गरेको छु।”

उनले थपे, “यो साइकल यात्रा मेरो व्यक्तिगत जित होइन, यो आशा र हौसला बाँड्ने अभियान हो। क्यान्सर लाग्ने जोखिम घटाउने, र पीडितहरूको उपचारका लागि सहयोग जुटाउने मुख्य उद्देश्य हो।”

लामाको यो यात्रामा कलाकार कविता चित्रकार समेत सहभागी हुँदैछिन्। उनले भनिन् –“हर्क लामाजस्ता योद्धा हाम्रो प्रेरणाको स्रोत हुन्। क्यान्सरले जीवन अन्त्य गर्दैन, यसले नयाँ सुरुवातको अवसर दिन्छ।”

अभियानमा मेघेन्द्रे महाकालसिंहका साइकल प्रेमी, विभिन्न संघ–संस्था, र रोटरी तथा लायन्स क्लबका सदस्यहरूले पनि सहभागिता जनाउने भएका छन्। यात्राका क्रममा देशका विभिन्न स्थानमा क्यान्सर रोग पहिचानका लागि स्क्रिनिङ शिविरहरू सञ्चालन गरिनेछ।

धुलिखेल अस्पतालका निर्देशक डा. रामकण्ठ श्रेष्ठले अभियानलाई ऐतिहासिक कदम बताउँदै भने –“लामाको यो पहलले हजारौँलाई प्रेरित गर्नेछ। उनी स्वयं क्यान्सर विजेता हुन्, उनको संघर्ष र सकारात्मक सोच नै यो अभियानको आधार हो।”

साइकल यात्रा सम्पन्न भएपछि संकलित रकम ‘क्यान्सर बिरामी सहयोग कोष’ स्थापनाका लागि धुलिखेल अस्पताललाई हस्तान्तरण गरिनेछ।

लामाको शब्दमा, “मैले लगभग पुनर्जन्म पाएको महसुस गरेको छु। अब यो पुनर्जन्म समाजको सेवामा समर्पित गर्ने समय हो।”