काठमाडौं- नेकपा (माओवादी केन्द्र) का सांसद माधव सापकोटाले धितोपत्र बोर्डले आईपीओ जारी गर्नका लागि साना तथा ठूला जलविद्युत आयोजनाबाट कमिसन मागेको विषय बाहिरिएको भन्दै त्यसबारे तत्काल छानबिन गर्न माग गरेका छन् । सांसद सापकोटाले आजको प्रतिनिधिसभा बैठकमार्फत उक्त विषयमा भरपर्दो संयन्त्रबाट छानबिन गराउन माग गरेका हुन् । धितोपत्र बोर्डले आईपीओ जारी गर्नका लागि ५ देखि ७ प्रतिशतसम्म कमिसन मागिएको भन्ने समाचारको विषय उठाउँदै छानबिनको माग गरेका हुन् ।

सापकोटाले इप्पानका अध्यक्ष र सदस्यले नै खुलासा गरेको भन्दै उक्त विषय गम्भीर रहेको बताए । उनले भने,‘इप्पाका अध्यक्ष र सदस्यले नै खुलासा गर्नुभएको छ कि धितोपत्र बोर्डले ठूला आयोजनाबाट ५ प्रतिशत र साना आयोजनाबाट ७ प्रतिशत माग्दै बार्गेनिङ भयो । यो समाचारप्रति प्रतिपक्षको गम्भीर ध्यानाकर्षण भएको छ ।’ यो विषय राप्रपाकी सांसद रोशन कार्कीले पनि उठाएकी छिन् ।