काठमाडौँ । गोकर्णेश्वर नगरपालिकाको आर्थिक सहयोगमा झोल साबुन, फिनेल र हार्पिक निर्माणसम्बन्धी तालिम संचालन भएको छ। होचापुड्का समुदायलाई आत्मनिर्भर बनाउने उद्देश्यका साथ नगरपालिकाले साबन, फिनेल, हार्पिक बनाउने तालिम प्रदान गरेको हो ।

समुदायको सीप विकास, स्वरोजगार र आर्थिक सबलीकरणलाई केन्द्रमा राखेर आयोजना गरिएको तालिमले सहभागीहरूमा नयाँ उत्साह र आत्मविश्वास थपेको छ।

तालिम संचालन कार्यक्रममा बोल्दै गोकर्णेश्वर नगरपालिकाका नगर प्रमुख दीपक रिसालले होचापुड्का समुदायको सशक्तीकरण नगरपालिकाको प्राथमिकतामा रहेको स्पष्ट पारे। उनले “होचापुड्का समुदायलाई आत्मनिर्भर बनाउने दिशामा नगरपालिकाले सबै सहयोग गर्ने बताएका छन् । उनले सीप, तालिम र रोजगारीका अवसर सिर्जना गरेर उनीहरूलाई सम्मानजनक जीवनयापनतर्फ अघि बढाउनु नगरपालिकाको दायित्व रहेको समेत बताए ।

नगर प्रमुख रिसालले उत्पादनमूलक तालिममार्फत समुदाय आफैंले आम्दानी गर्न सक्ने आधार तयार हुनु सकारात्मक उपलब्धि भएको उल्लेख गर्दै, भविष्यमा पनि यस्ता कार्यक्रमलाई निरन्तरता दिइने प्रतिबद्धता जनाएका छन्।

होचापुड्का समुदाय नेपालका परम्परागत रूपमा सीमान्तकृत र उपेक्षित समुदायहरूमध्ये एक हो। यो समुदाय सामाजिक, आर्थिक र शैक्षिक अवसरबाट वञ्चित रहँदै आएको पाइन्छ। श्रम र सीपमा आधारित जीवनशैली अपनाउँदै आएका होचापुड्का समुदायले लामो समयसम्म राज्यका निकाय र लक्षित कार्यक्रमबाट अपेक्षित लाभ पाउन सकेका थिएनन्।

समयक्रममा सामाजिक चेतनाको विकास र समावेशी नीतिहरूको अभ्याससँगै यो समुदायले पनि अधिकार, पहिचान र आत्मसम्मानका लागि आवाज उठाउँदै आएको छ। पछिल्ला वर्षहरूमा स्थानीय तहको सक्रियतासँगै होचापुड्का समुदायलाई लक्षित तालिम, शिक्षा र आयआर्जनका कार्यक्रमहरू विस्तार हुँदै गएका छन्।

नगरपालिकाको सहयोगमा संचालन भएको साबुन, फिनेल र हार्पिक बनाउने तालिमले दैनिक उपभोग्य वस्तु उत्पादनमार्फत स्थानीय बजारमा प्रवेश गर्ने सम्भावना बोकेको छ। उक्त तालिम मार्फत स्थानीय तहको सहयोग, समुदायको सक्रिय सहभागिता र सीप विकासको संयोजनले होचापुड्का समाजलाई आत्मनिर्भरतातर्फ डोर्‍याउने अपेक्षा गरिएको छ। यो तालिम केवल सीप हस्तान्तरणमा सीमित नभई, होचापुड्का समुदायको आत्मसम्मान, पहिचान र आर्थिक सशक्तीकरणको दिशामा एउटा महत्वपूर्ण कदमका रूपमा हेरिएको छ।

तालिममा सहभागीहरूले आफूले सिकेको सीपलाई व्यवहारमा उतारेर साना उद्यम सञ्चालन गर्ने विश्वास व्यक्त गरेका छन्।