काठमाडौं प्रवेशमा कडाइ, एन्टिजेन परीक्षण अनिवार्य

  • झरना खबर
  • २०७७ चैत्र २४ गते ०८:१६ बजे प्रकाशित

काठमाण्डौ : भारतबाट नेपाल प्रवेश गर्नेहरूमा नयाँ भेरियन्ट प्रमाणित भएकाले नेपालका विभिन्न नाकाका साथै काठमाडौं उपत्यकामा प्रवेश गर्ने नाकाहरूमा शंकास्पद व्यक्तिमा एन्टिजेन परीक्षण गर्ने तयारी भइरहेको स्वास्थ्य तथा जनसंख्या मन्त्रालयले जनाएको छ । खुला सिमाना र कोरोना संक्रमणका कारण भारतमा कामका लागि गएका नेपालीहरू नेपाल फर्कने र नेपालमा कार्यरत भारतीय कामदारहरू पनि होली मनाउन भारत गएर अहिले नेपाल फर्कने क्रम बढेसँगै नेपालमा पनि कोरोना संक्रमितको संख्या बढेको छ ।

यिनै अवस्थालाई मध्यनजर गर्दै स्वास्थ्य तथा जनसंख्या मन्त्रालयले सीमानाकालगायत काठमाडौं उपत्यकामा प्रवेश गर्नुअघि शंकास्पद व्यक्तिको एन्टिजेन परीक्षणका लागि हेल्थ डेस्कको व्यवस्था गर्ने भएको छ ।सोमबार बसेको जिल्ला कोभिड–१९ नियन्त्रण तथा रोकथाम समिति काठमाडौंको बैठकले नाकाहरूमा सम्बन्धित नगरपालिकाहरूले स्वास्थ्य जाँच र एन्टिजेन टेस्ट गर्न डेक्सको व्यवस्था मिलाउने र सम्पर्क व्यक्ति तोक्ने निर्णय गरेको हो ।

एन्टिजेन परीक्षणबाट नेगेटिभ देखिएको तर व्यक्तिमा लक्षण देखिई शंकास्पद लागेका उक्त व्यक्तिलाई पीसीआर परीक्षणका लागि पठाइने निर्णय पनि बैठकले गरेको छ ।बैठकले यसअघि सबै महानगरपालिका र नगरपालिका सञ्चालन गरिएका आइसोलेसन र क्वारेन्टाइन सेन्टरलाई अद्यावधि गर्ने र सबै नगरपालिकामा १–१ वटा क्वारेन्टाइन र आइसोलेसन सञ्चालन गर्ने निर्णय पनि गरेको छ ।

निर्णयमा कोभिड–१९ सम्बन्धी जनस्वास्थ्य मापदण्ड पूर्ण पालना नगर्नेलाई कारबाही गरेर जरिवाना गर्ने, कोभिडसम्बन्धी जनचेतना फैलाउनका लागि नर्स, स्वास्थ्यकर्मी र शिक्षकशिक्षिकालाई परिचालन गर्ने पनि उल्लेख गरिएको छ । यसका साथै चीन सरकारले हालै उपलब्ध गराएको कोभिड–१९ विरुद्धको खोप बुधबारबाट लगाउन शुरु गरिने छ । नेपाल समाचारपत्र दैनिकबाट

सम्बन्धित समाचारहरू

Comments