ताप्लेजुङमा भिषण आगलागी : कम्तिमा ५५ घर पूर्ण रूपमा जलेर नष्ट(अपडेट)

  • झरना खबर
  • २०७७ फाल्गुण १८ गते १८:२९ बजे प्रकाशित

विराटनगर – ताप्लेजुङको दोभान बजार आगलागीमा कम्तिमा ५५ घर पूर्ण रूपमा जलेर नष्ट भएका छन्। 

घटनास्थलमै रहेकी ताप्लेजुङकी सहायक प्रमुख जिल्ला अधिकारी गायत्रा अधिकारी खड्काले दिएको जानकारी अनुसार अहिलेसम्म ५५ घर नष्ट भएको तथ्यांक आएको छ।

‘अहिलेसम्म ५५ वटा घर पूरै जलेको डाटा आएको छ’, उनले भनिन्,‘यो संख्या थोरै तलमाथि हुनसक्छ।’ 

उनका अनुसार बजार क्षेत्र भएका कारण कपडा पसल, कृषि सामग्रीका पसल, किराना पसलहरू तथा भण्डारण गरिएका अलैंची जस्ता कृषि उत्पादन जलेर नष्ट भएका छन्।

आगो पूरै नियन्त्रणमा आइनसके पनि थप फैलिन चाहिँ रोकिएको सहायक प्रजिअले जानकारी दिइन्।

ताप्लेजुङको मेरिङदेन गाउँपालिका– ३ स्थित दोभान बजारमा आज बिहान सवा नौ बजेदेखि आगलागी सुरू भएको थियो।

सम्बन्धित समाचारहरू

Comments